Friday, December 1, 2017

തൂവലുകള്‍

വീണ്ടും ഒരു ഡിസം‌ബര്‍. ഉലഞ്ഞുടഞ്ഞ പൂക്കളും പൂങ്കാവനവും.സങ്കടപ്പെരുമഴയുടെ സംഗീതം കാതോര്‍‌ത്ത്‌ മരക്കൊമ്പിലമര്‍ന്നിരിക്കുന്ന പൈങ്കിളികളും.വിങ്ങിപ്പൊട്ടുന്ന സായാഹ്നം.സുധീരനായ കൗമാരക്കാരന്‍ മുഹമ്മദ്‌ ഫാസില്‍ വിടരും മുമ്പേ അടര്‍ന്നു വീണ നിമിഷങ്ങള്‍.

ആത്മവിശ്വാസത്തിന്റെയും അതിലേറെ ശുഭ പ്രതീക്ഷയുടെയും കരുത്തില്‍ വേദനയുടെ വേനലിലും കുരുത്ത്‌ നില്‍‌ക്കുകയായിരുന്നു മുഹമ്മദ്‌ ഫാസില്‍.ആശ്വസിപ്പിക്കുന്നവരുടെ സഹതാപ ധൂമത്തെ നിഷ്‌കളങ്കമായ വിശ്വാസ നൈര്‍‌മല്യം പ്രസരിപ്പിച്ച്‌ തൂത്തെറിയാന്‍ ഫാസിലിനു കഴിയുമായിരുന്നു.ആയുസ്സുണ്ടെങ്കിലും ഇല്ലെങ്കിലും ഒരു പരിഭവവും ഈ കൗമാരക്കാരനുണ്ടായിരുന്നില്ല.അല്ലാഹു തനിക്ക്‌ വിധിച്ചതെന്താണെങ്കിലും സ്വീകരിക്കാന്‍ ഫാസിലിന്റെ മനസ്സും ശരീരവും പാകപ്പെട്ടിരുന്നു.

തന്നെച്ചൊല്ലി മറ്റുള്ളവര്‍ വേദനിക്കുന്നതിലും പ്രയാസപ്പെടുന്നതിലും വല്ലാതെ അസ്വസ്ഥത മുഹമ്മദ്‌ ഫാസിലിന്റെ പ്രകൃതമായിരുന്നു.ഉമ്മയോട്‌ ഭയപ്പെടേണ്ട കാര്യമില്ലെന്നും യാത്രയാകാന്‍ നാഴികകള്‍ മാത്രമാണുള്ളതെന്നും മരണാസഹ്ന ദിന രാത്രങ്ങളില്‍ തന്നെ ഫാസില്‍ ഓര്‍‌മ്മപ്പെടുത്തിയിരുന്നു.ഉമ്മൂമയും ഉമ്മയും ഉണ്ണികളും സഹോദരങ്ങളും ബന്ധുമിത്രാധികളും അവസാനയാത്രയ്‌ക്ക്‌ കണ്‍‌പാര്‍‌ത്ത്‌ തനിക്ക്‌ ചുറ്റും ഉണ്ടാവണമെന്ന ശാഠ്യം പലപ്പോഴും ഹൃദയഭേദകം എന്നതിനുമപ്പുറമുള്ള മാനങ്ങള്‍ കൈവരിച്ചിരുന്നു.

അന്ത്യ നിമിഷങ്ങളില്‍ ഒരു കുതിര സവാരിക്കാരന്റെ കിതപ്പും കുതിപ്പും പ്രകടമായിരുന്നു.ഇത്‌ ബോധം നഷ്‌ടപ്പെട്ടവന്റെ ഗോഷ്‌ഠികളായിരുന്നില്ലെന്നു തിരിച്ചറിയാന്‍ ഫാസിലിന്റെ ഉമ്മൂമയ്‌ക്ക്‌ കഴിഞ്ഞിരുന്നു.ആഘോഷ മൈതാനങ്ങളില്‍ നിഷ്‌കളങ്കരായ പൈതങ്ങള്‍ ഇഷ്‌ടപ്പെട്ട കളിക്കോപ്പുകള്‍ കണ്ട്‌ കൊഞ്ചും വിധം ഉത്സാഹഭാവത്തോടെ...അവന്‍ പറന്നകലുകയായിരുന്നു.ഉമ്മൂമ പകര്‍‌ന്നു കൊടുത്ത ദാഹജലം കൊണ്ട്‌ തൊണ്ട നനച്ച്‌,സര്‍‌വലോക പരിപാലകനായ നാഥന്റെ സ്‌മരണകള്‍ കൊണ്ട്‌ ചുണ്ട്‌ നനച്ച്‌ ഫാസില്‍ ശാന്തനായി വിടപറഞ്ഞു.

പ്രകൃതിരമണീയമായ പാടൂര്‍ പള്ളി പരിസരത്ത്‌ ഒരു തണ്ണീര്‍തടത്തിന്റെ ചാരത്ത്‌ തണലിട്ട മരച്ചുവട്ടില്‍ ഒരുക്കിയ ഖബറിടത്തിലാണ്‌ ഫാസിലിന്റെ ഭൗതിക ശരീരം അടക്കം ചെയ്‌തത്. അനശ്വരമായ സ്വര്‍‌ഗീയ വിതാനത്തില്‍ മുഹമ്മദ്‌ ഫാസില്‍ ഓര്‍‌മ്മയായി.അല്ലാഹു അനുഗ്രഹിക്കുമാറാകട്ടെ. 


ഡിസംബര്‍ കാലത്തെ ശൈത്യം. എന്തുകൊണ്ടോ തണുപ്പനുഭവപ്പെടുന്നില്ല.ഒരു വര്‍‌ഷത്തിന്റെ അന്ത്യം.മറ്റൊരു വര്‍ഷത്തിന്റെ പ്രാരം‌ഭത്തിലേയ്‌ക്കുള്ള പ്രയാണം.പുതിയ ഉണര്‍‌വും ഉന്മേഷവും ശൈത്യകാലത്തെ പുകമഞ്ഞില്‍ മൂടിപ്പുതച്ചുറങ്ങുന്ന കാലം. പാടശേഖരങ്ങളും,പാതയോരങ്ങളും, വസന്തം വിരിയുന്ന കാലം.ആഘോഷങ്ങളുടെ പൂവിരിയും കാലത്തും വിരിയും മുമ്പേ വീണുടയുന്ന പൂക്കള്‍.ആ പുക്കളെ ചൊല്ലി അറിഞ്ഞൊ അറിയാതെയൊ വേപഥു പൂണ്ട്‌ ഉയര്‍‌ന്നും താഴ്‌ന്നും പറക്കുന്ന പൂതുമ്പികള്‍...

പക്ഷികള്‍ പറന്നു പോകുമ്പോള്‍ പൊഴിച്ചിടുന്ന ചില തൂവലുകളുണ്ടാകും.ഒഴിഞ്ഞ കൂട്ടിലും വൃക്ഷ ശിഖിരങ്ങളിലും ചിതറി വീണ ഈ ഹൃദയഹാരിയായ തൂവലുകള്‍.അതില്‍ തൊട്ടു തലോടുമ്പോള്‍ മിഴികളില്‍ ചേര്‍‌ത്തു വെയ്‌ക്കുമ്പോള്‍ നാം മറ്റൊരു ലോക സഞ്ചാരം നടത്തും.ഫാസില്‍ മോന്‍ ഇവിടെ പൊഴിച്ചിട്ട ചില തൂവലുകള്‍ തൊട്ടുഴിയുകയാണ്‌.

2015 ജൂണ്‍ അവസാനത്തില്‍ കുടും‌ബസമേതം നടത്തിയ വിനോദയാത്ര ഒരിക്കല്‍ കൂടെ പങ്കു വെയ്‌ക്കുന്നു.നിമിഷ പ്രസം‌ഗത്തില്‍ മുഹമ്മദ്‌ ഫാസില്‍ ഒന്നാമനായിരുന്നു.2016 ഡിസം‌ബര്‍ മാസത്തില്‍ ഒന്നാമനില്‍ ഒന്നാമനായി എല്ലാവരേയും പിന്നിലാക്കി ഫാസില്‍ പറന്നു പോയി.മുഹമ്മദ്‌ ഫാസില്‍ പറന്നു പോയ നിറം മങ്ങിയ വസന്തകാലം ഇതാ വീണ്ടും സമാഗതമായിരിക്കുന്നു.ഡിസം‌ബര്‍ 2017.
......
പെരുന്നാള്‍ അവധിയില്‍ ഞങ്ങളൊരു വിനോദയാത്ര പോയി.കളിയും കാര്യവും ചിരിയും ചിന്തയുമുണര്‍‌ത്തുന്ന പരിപാടികള്‍ വിനോദയാത്രയെ ഏറെ ഹൃദ്യമാക്കി.

ശനിയാഴ്‌ച പുലര്‍‌ച്ചയ്‌ക്ക്‌ പുറപ്പെട്ടു തിങ്കളാഴ്‌ച്ച പുലര്‍‌ച്ചയ്‌ക്ക്‌ വീട്ടില്‍ തിരിച്ചെത്തി.ഷഫീക്കിന്റെ നേതൃത്വത്തില്‍ തിര ടീമും ഷറഫുദ്ധീന്റെ നേതൃത്വത്തിലുള്ള തീരം ടീമും വിവിധ മത്സരങ്ങളില്‍ തീരവും തിരയും പോലെ മത്സര മികവു പ്രകടിപ്പിച്ചിരുന്നു.ഒടുവില്‍ തിര തീരത്തെ കീഴടക്കുമ്പോലെ അക്ഷരാര്‍‌ഥത്തില്‍ വിജയശ്രിലാളിതരായി.വാശിയേറിയ മത്സരത്തില്‍ മൂന്ന്‌ ഒന്നാം സ്ഥാനങ്ങളാണ്‌ ഷഫീക്കിന്റെ നേതൃത്വത്തിലുള്ള തിര കരസ്ഥമാകിയത്‌.മറ്റൊരു പ്രത്യേക മത്സരത്തില്‍ ഒന്നാം സ്ഥാനത്തെത്തിയതോടെ ഷറഫുദ്ധീന്റെ നേതൃത്വത്തിലുള്ള തീരവും ശാന്തമായി.

കുട്ടിപ്പട്ടാളത്തിന്റെ സര്‍‌ഗസിദ്ധി സടകുടഞ്ഞെണീറ്റപ്പോള്‍ മത്സര രം‌ഗത്തിന്റെ ഹാവഭാവങ്ങള്‍‌ക്ക്‌ പുതിയ ചിറകുകള്‍ മുളച്ചു.മുഹമ്മദ്‌ സഫ്‌വാന്റെ ഖുര്‍‌ആന്‍ പാരായണവും അന്‍‌ഫാല്‍ അഷറഫിന്റെ ഉമ്മയെക്കുറിച്ചുള്ള പാട്ടും ഏറെ ആസ്വാദ്യകരമായിരുന്നു.ആദില്‍ അഷറഫിന്റെ ഗാനാലാപനം തല്‍‌സമയ സമ്മാനം നേടിയതോടെ ഓമനകളുടെ ഉത്സാഹത്തിമര്‍‌പ്പ്‌ പത്തിരട്ടി വര്‍‌ദ്ധിച്ചു.തുടര്‍‌ന്നു അദ്‌നാന്‍ യൂസഫും  മുഹമ്മദ്‌ സല്‍‌മാന്‍ ഷറഫുദ്ധീനും മുഹമ്മദ്‌ സഫ്‌വാന്‍ ഷറഫുദ്ധീനും തത്സമയ സമ്മാനത്തിന്‌ അര്‍‌ഹരായി.പിഞ്ചു കുഞ്ഞുങ്ങളായ മിന്‍‌ഹ ഷാഹീറും മയ്ഷ ഷഫീക്കും പരസ്‌പരം നോക്കി അത്‌ഭുതം കൂറിയിരുന്നു എന്നു പറഞ്ഞാല്‍ മത്സരക്കളത്തിന്റെ വീറും വാശിയും ഒരു പക്ഷെ ഊഹിക്കാന്‍ കഴിയുമായിരിക്കും.അമീന അസീസ്‌ ഒരു കഥ അവതരിപ്പിക്കാന്‍ ശ്രമിച്ചു പിന്‍‌വാങ്ങി.എന്നാല്‍ അനുഭവങ്ങള്‍ പങ്കുവെച്ചപ്പോള്‍ വാചാലയായി.

ഉമ്മ തന്നയച്ച ഉച്ചഭക്ഷണം ഇഷ്‌ടപ്പെടാത്ത അവസ്ഥയില്‍ തിരിച്ച്‌ വീട്ടിലെത്തി പ്രതികരിക്കുന്ന വിഷയത്തെ ആസ്‌പദപ്പെടുത്തിയ നിമിഷ പ്രസം‌ഗം പങ്കാളിത്തം കുറഞ്ഞുപോയെങ്കിലും പങ്കെടുത്തവര്‍ വിളമ്പിയതിന്റെ പേരിലുള്ള ബഹളം ശാന്തമാക്കാന്‍ കഠിനയജ്ഞം നടത്തേണ്ടിവന്നു.ഒന്നാം സ്ഥാനം ഫാസില്‍ ഷംസുദ്ധീനും,രണ്ടാം സ്ഥാനം അന്‍‌സാര്‍ അസീസും, പ്രോത്സാഹന സമ്മാനം അമീന അസീസും, മുഹമ്മദ്‌ സല്‍‌മാനും, അജ്‌മല്‍ ഷം‌സുദ്ധീനും  നേടി.തിര ടീമിനെ ഊര്‍‌ജസ്വലമാക്കുന്നതില്‍ വലിയ പങ്കുവഹിച്ച ഷഫ്‌ന അഷറഫ്‌ പ്രത്യേക പാരിതോഷികം കരസ്ഥമാക്കി. മൂന്നു വയസ്സുകാരായ അംന അഷറഫും, അമീന്‍ യൂസഫും ഒന്നര വയസ്സുകാരിയായ ഐഷ ഷറഫുദ്ധീനും,  അഞ്ചു വയസ്സുകാരനായ ആദില്‍ അഷറഫും പ്രത്യേക പരിഗണനക്കും പ്രശം‌സക്കും അര്‍‌ഹരായി.

വിനോദയാത്രയുമായി ബന്ധപ്പെട്ട അനുഭവങ്ങള്‍ പങ്കുവെക്കാന്‍ നല്‍‌കപ്പെട്ട അവസരം അന്‍‌സാര്‍ അസീസും ഷജീല ഷറഫുദ്ധീനും അതിമനോഹരമായി ഉപയോഗപ്പെടുത്തി.അമീനമോള്‍ ഏറെ വാചലയായതും ശ്രദ്ധേയമായിരുന്നു.ഇവര്‍ പറഞ്ഞതു തന്നെയാണ്‌ ഞങ്ങള്‍ക്കും എന്നു പറഞ്ഞു മറ്റുള്ളവര്‍ വളരെ സമര്‍ഥമായി ഒഴിഞ്ഞു നിന്നു.

ബഹളമയമെങ്കിലും ആസ്വാദ്യകരമായ കലാവിരുന്നിന്‌ ക്ഷമാപൂര്‍‌വം കാഴ്‌ചക്കാരായ ഷം‌സുദ്ധീന്‍,യൂസഫ്‌,അഷറഫ്‌,ഷറഫുദ്ധീന്‍,ഷഫീഖ്‌, ഹലീമ ബക്കര്‍, സീനത്ത്‌ ഷം‌സുദ്ധീന്‍, ഷംല യൂസഫ്‌,സുല്‍‌ഫിത്ത്‌ അഷറഫ്‌,റഹ്‌മത്ത് ഷഫീഖ്‌,മുനീറ ഷാഹിര്‍,ഹിബ അസീസ്‌,ഫാത്തിമ മുസ്‌തഫ,നസ്‌റിന്‍ യൂസഫ്‌,ഷറിന്‍ യൂസഫ്‌,കുത്സു ഷംസുദ്ധീന്‍,ഷജീല ഷറഫുദ്ധീന്‍,ഹമദ്‌ അസീസ്‌,അബിയാന്‍ അഷറഫ് എന്നിവരെ പ്രത്യേകം സത്‌കരിക്കും.പ്രസ്‌തുത ചടങ്ങില്‍ മറ്റു സമ്മാനാര്‍‌ഹരും കുടും‌ബാം‌ഗങ്ങളും ക്ഷണിക്കപ്പെടും.
മഞ്ഞിയില്‍
27.07.2015

Sunday, November 12, 2017

തലമുറക്കണ്ണികള്‍

ഉമ്മയും ഉപ്പയും ഞങ്ങള്‍ കുടും‌ബാം‌ഗങ്ങള്‍ 12 പേര്‍.രണ്ടാം തലമുറയില്‍ 34 മക്കള്‍.മൂന്നാം തലമുറയില്‍ 57 പേര്‍.നാലാം തലമുറയില്‍ 11 പേര്‍.ഇങ്ങനെ 114 മക്കളും പേരമക്കളും.വിവാഹ ബന്ധങ്ങള്‍ വഴിയുള്ള ഇണ തുണകള്‍ 46 പേര്‍.എല്ലാവരും കൂടെ 160 പേര്‍. ഇതില്‍ സഹോദരി ആമിനക്കുട്ടിയുടെ മകള്‍ സീനത്തിന്റെ രണ്ടാമത്തെ പുത്രന്‍ അഫ്‌സലിന്റെ രണ്ടാമത്തെ മകനാണ്‌ നാലാം തലമുറയിലെ പതിനൊന്നാമന്‍.ഉമ്മയുടെ വിയോഗാനന്തരം ഈ കുടുംബത്തില്‍ വന്ന പുതിയ അതിഥിയാണ്‌ അഫ്‌സല്‍ ഷം‌സുദ്ധീന്റെ പുത്രന്‍.സ്‌നേഹ നിധിയായ ഉമ്മയുടെ വിയോഗത്തിന്റെ തൊട്ടു മുമ്പ്‌ സഹോദരി ഫാത്തിമ്മ അബൂബക്കറിന്റെ രണ്ടാമത്തെ മകള്‍ ഹസീന ലത്വീഫിന്റെ മൂന്നാമത്തെ പുത്രനാണ്‌ മൂന്നാം തലമുറയില്‍ അമ്പത്തിയേഴാമത്തെ അം‌ഗം.

Wednesday, November 1, 2017

പുഴങ്ങര ഇല്ലത്ത് സെയ്‌ത്‌ മുഹമ്മദ്‌ ഹാജി

തൊയക്കാവ്‌:പുഴങ്ങര ഇല്ലത്ത് കോഴിപ്പറമ്പില്‍ സെയ്‌ത്‌ മുഹമ്മദ്‌ ഹാജി നിര്യാതനായി.വാര്‍‌ദ്ധക്യ സഹജമായ പ്രയാസങ്ങളാല്‍ ആശുപതിയില്‍ ചികിത്സയിലായിരുന്നു.സുഖം പ്രാപിച്ച്‌ കഴിഞ്ഞ ദിവസം വീട്ടിലേയ്‌ക്ക് കൊണ്ടു വന്നു.വീണ്ടും ശാരീരികമായ പ്രയാസം അനുഭവപ്പെട്ടതിനെ തുടര്‍‌ന്ന്‌ എം.ഐ ആശുപത്രിയില്‍  തീവ്ര പരിചരണ വിഭാഗത്തില്‍ പ്രവേശിപ്പിച്ചുവെങ്കിലും ജീവന്‍ രക്ഷിക്കാന്‍ കഴിഞ്ഞില്ല.സന്ധ്യയോടെയായിരുന്നു അന്ത്യം.വ്യാഴാഴ്‌ച നവം‌ബര്‍ 2 ന്‌ 11 മണിക്ക്‌ തൊയക്കാവ്‌ മഹല്ല്‌ ഖബര്‍‌സ്ഥാനില്‍ ഖബറടക്കും.

മുപ്പട്ടിത്തറ ബാല ചികിത്സാ വിദഗ്ദന്‍ മുഹമ്മദ്‌ കുട്ടി വൈദ്യരുടെയും, കണ്ണോത്ത്‌ ഷാഹുല്‍ ബാവുട്ടി ഹാജിയുടെയും, അസീസ്‌ മഞ്ഞിയിലിന്റെയും ഉമ്മമാരുടെ സഹോദരിയുടെ മകനാണ്‌ പുഴങ്ങര ഇല്ലത്ത് സെയ്‌തു മുഹമ്മദ്‌.
പാടൂര്‍ അഹമ്മദ്‌ മുസ്‌ല്യാര്‍, അബ്‌ദുല്‍ റഹ്‌മാന്‍ കേലാണ്ടത്ത്,ഫാത്വിമ സലാഹുദ്ധീന്‍..തുടങ്ങിയവര്‍  സഹോദരങ്ങളാണ്‌.
ഭാര്യ:റുഖിയ.മക്കള്‍:റഫീഖ്‌,റഷീദ്‌,റസാഖ്‌,റസീന.മരുമക്കള്‍:സീനത്ത്,സഫരിയ,സജന,ഖാദര്‍കുട്ടി.

Monday, October 30, 2017

ഹാഷിദ സിദ്ധ വൈദ്യത്തിലേയ്‌ക്ക്‌

കേരളത്തിലെ പ്രഗത്ഭരും പ്രശസ്ഥരുമായ പണ്ഡിത വര്യന്മാരുടെ ചികിത്സാലയമായി തൊയക്കാവ്‌ മുട്ടിക്കലിനടുത്തുള്ള മേനോത്തകായില്‍ അറിയപ്പെട്ടിരുന്നു.പരമ്പരാഗത ആയുര്‍വേദ ചികിത്സാ രംഗത്തെ കുലപതികളുടെ പാരമ്പര്യം ശ്രേഷ്‌ഠമായി നില നിര്‍ത്തിപ്പോരുന്നതില്‍ തൊയക്കാവ്‌ മേനോത്തകായില്‍ വൈദ്യ കുടും‌ബത്തിലെ നാലാം തലമുറക്കാര്‍ പ്രതിജ്ഞാ ബദ്ധരത്രെ.

പ്രസിദ്ധ പാരമ്പര്യ വൈദ്യന്‍ അമ്മുണ്ണി വൈദ്യരുടെ ഇളം തലമുറയിലും കണ്ണി മുറിയാത്ത വൈദ്യ പാരമ്പര്യം കൊണ്ട്‌ അനുഗ്രഹീതമാണ്‌.ആയുര്‍‌വേദത്തിലും സിദ്ധ വൈദ്യത്തിലും ഏറെ പ്രശസ്ഥനായിരുന്നു പരേതനായ ഹാജി കുഞ്ഞു ബാവു വൈദ്യര്‍.അദ്ധേഹത്തിന്റെ മകന്‍ മുഈനുദ്ധീനും പാരമ്പര്യം നില നിര്‍‌ത്തി.മുഈനുദ്ധീന്‍ വൈദ്യരുടെ മകന്‍ ഡോക്‌ടര്‍ ഹഫീദ്‌ പുതിയ തലമുറയിലെ പശസ്‌തനു പ്രഗത്ഭനുമായ ഭിഷഗ്വരനാണ്‌.മുഈനുദ്ധീന്‍ വൈദ്യരുടെ സഹോദരങ്ങളായ അഹമ്മദ്‌,ഉസ്‌മാന്‍ എന്നിവരുടെ മക്കളും കണ്ണി മുറിയാത്ത വൈദ്യ പാരമ്പര്യം നില നിര്‍‌ത്തുന്നതില്‍ പ്രതിജ്ഞാ ബദ്ധരത്രെ.അഹമ്മദിന്റെ മക്കളില്‍ ഫാസില്‍ വൈദ്യശാസ്‌ത്ര പഠനം കഴിഞ്ഞിട്ടില്ല.മറ്റൊരു മകന്‍ അനസ്‌ അഹമ്മദും,വിവാഹിതയായ മകളും വൈദ്യ ശാസ്‌ത്രമല്ല തെരഞ്ഞെടുത്തിരിക്കുന്നത്.ഉസ്‌മാന്റെ ഒരു മകള്‍ ഫദീല നിഷാര്‍ പഠനാനന്തരം ഔഷധിയില്‍ സേവനമനുഷ്‌ടിക്കുന്നു.രണ്ടാമത്തെ മകള്‍ ഉസ്‌മിത ഷബീബും,മകന്‍ ഹാഷിം ഉസ്‌മാനും വേറിട്ട വഴിയിലാണ്‌.ഇളയ മകള്‍ ഹാഷിദ സിദ്ധ വൈദ്യത്തിലേയ്‌ക്കുള്ള പ്രഥമ പാദത്തിലാണ്‌.വിജയകരമായ എന്‍‌ട്രന്‍‌സ്‌ പ്രവേശനത്തിലൂടെ രാജ ഗിരിയില്‍ പഠനത്തിനുള്ള ഒരുക്കത്തിലാണ്‌.

Sunday, October 29, 2017

ഉമ്മയുടെ വിയോഗാനന്തരം

ഉമ്മയുടെ വിയോഗാനന്തരം പ്രിയപ്പെട്ടവര്‍ പലരും പ്രതികരിക്കുകയും സമാശ്വസിപ്പിക്കുകയും പ്രാര്‍‌ഥിക്കുകയും സന്ദേശങ്ങള്‍ അറിയിക്കുകയും ചെയ്‌തിരുന്നു.എന്റെ പ്രിയ സുഹൃത്ത് കെ.വി നിസാര്‍ സാഹിബ്‌ അയച്ച സന്ദേശം മാത്രം ഇവിടെ പങ്കു വെയ്‌ക്കുന്നു.

ഉമ്മ ഉറങ്ങുന്ന വീടും ഉമ്മ ഇറങ്ങിപ്പോയവീടും , തീർത്തും വ്യത്യസ്തമായ രണ്ടു അവസ്ഥകളാണ് . ഉറങ്ങുന്ന ഉമ്മയുള്ള വീടു പോലും ഉണർന്നിരിക്കുന്നവർക്ക് ആശ്വാസകരവും നിർഭയത്വം നൽകുന്നതുമാണ് . തൻ്റെ ഉറക്കത്തിലും, ഉണർന്നും ഉറങ്ങിയുമിരിക്കുന്ന മക്കൾക്ക് ഉയിരും ഊർജവും നൽകാൻ സാധിക്കുന്നു എന്നതാണ് ഉമ്മ എന്ന അത്ഭുത പ്രതിഭാസത്തിനു മാത്രമുള്ള കഴിവ് .തൻ്റെ മക്കൾക്ക്  മാത്രമല്ല മക്കളായ ചുറ്റുമുള്ള മുഴുവൻ മനുഷ്യ മക്കൾക്കും തൻ്റെ "ഉമ്മത്വം" (മാതൃത്വം ) ഏറിയും കുറഞ്ഞും നൽകാൻ ഉമ്മമാർക്കു മാത്രം കഴിയുന്നു . അങ്ങിനെയുള്ള ഒരു ഉമ്മ ഇറങ്ങിപ്പോയ വീട്ടിലുള്ള അസീസ്‌ സാഹിബിനോട് "ഉമ്മ ഇറങ്ങിപ്പോയവീടിനെകുറിച്ചു" എന്റെ ഓരോ വാക്കും എന്റെ കൂടി വ്യഥകളായിരിക്കും .നിങ്ങളുടെ ,കുടുംബത്തിന്റെ വ്യസനത്തിൽ പങ്കു ചേരുന്നു എന്ന് മാത്രം കുറിക്കട്ടെ .

അസീസ് സാഹിബ് താങ്കൾ മഹാഭാഗ്യവാനായാണ് . 92 വർഷം ഉമ്മയെ ലഭിച്ച മഹാ ഭാഗ്യശാലി. ശാന്തമായി ,സംതൃപ്തി നിറഞ്ഞ മനസ്സുമായി നാഥനെ കണ്ടുമുട്ടാൻ  ഉമ്മ പോകുമ്പോൾ അതിനു സാക്ഷിയാവാൻ താങ്കള്‍‌ക്കും കുടുംബത്തിനും സാധിച്ചു അൽഹംദുലില്ലാഹ് . ഒരു തവണമാത്രമേ ആ ഉമ്മയെ കാണാൻ എനിക്കും കുടുംബത്തിനും സാധിച്ചുള്ളൂ. ഉമ്മയെ കുറിച്ച് നിങ്ങൾ പറയുമ്പോഴൊക്കെ കാണണം എന്ന് അതിയായി ആഗ്രഹിച്ചു.  ഇത്തവണത്തെ യാത്രയിൽ അതിനു സാധിച്ചപ്പോൾ മനസ്സിൽ തങ്ങിനിൽക്കുന്ന കൂടിക്കാഴ്ചയായി അത് മാറി . കുളിരേകുന്ന കാഴ്ചകൾ നിറഞ്ഞ യുഗം തീർത്ത്‌, നാഥൻറെ മാർഗത്തിൽ പണിയെടുക്കുന്ന മക്കളെയും പേരമക്കളെയും ബാക്കിയാക്കി യാത്രയായ താങ്കളുടെ ഉമ്മാക്ക് അല്ലാഹു മഗ്ഫിറത്തും മർഹമത്തും നൽകി അനുഗ്രഹിക്കട്ടെ . ഉമ്മയുടെ വിരഹം താങ്ങാനും സഹിക്കാനുമുള്ള ഹൃദയ വിശാലതയും മനക്കരുത്തും നൽകി അല്ലാഹു താങ്കളേയും കുടുംബത്തെയും അനുഗ്രഹിക്കട്ടെ.

ഫിർദൗസിന്റെ കവാടങ്ങൾ താങ്കളുടെ ഉമ്മാക്ക് വേണ്ടി തുറക്കാതിരിക്കില്ല.ഹൗദുൽ കൗസറിൽ മുത്തു നബിയുടെ തിരുകരം താങ്കളുടെ പ്രിയപ്പെട്ട ഉമ്മയെ തേടി എത്താതിരിക്കില്ല.ഒരിക്കലും മരിക്കാത്ത ഓർമകളിൽ ജീവിക്കുന്ന താങ്കളുടെയും കുടുംബത്തിന്റെയും വ്യസനത്തിൽ പങ്കുചേർന്നുകൊണ്ട് , പ്രാത്ഥനയോടെ.
താങ്കളുടെ സഹോദരൻ ,
നിസാർ കെ വി