Monday, January 1, 2018

പതിനെട്ടിലേയ്‌ക്ക്‌

ഓര്‍‌മ്മവെച്ച നാള്‍‌ മുതലുള്ള നൊമ്പരങ്ങളില്‍ നഷ്‌ടബോധങ്ങളില്‍ മിഴിനീരോടെ നില്‍‌ക്കുന്ന ചില വര്‍‌ഷങ്ങളുണ്ട്‌.1982 ല്‍ ഡിസം‌ബര്‍‌ മാസത്തിലായിരുന്നു പ്രിയപ്പെട്ട പിതാവ്‌ വിടപറഞ്ഞത്.ഏകദേശം ഏഴു വര്‍‌ഷങ്ങള്‍‌ക്ക്‌ ശേഷം 1989 ല്‍ അളിയന്‍ മുഹമ്മദ്‌ പി.സിയും ഈ ലോകത്തോട്‌ യാത്ര പറഞ്ഞു.തൊണ്ണൂറുകളിലാണ്‌ സഹധര്‍‌മ്മിണിയുടെ പിതാവിന്റെ അന്ത്യം.തൊണ്ണൂറുകളില്‍ തന്നെയായിരുന്നു സഹോദരി ഫാത്വിമ അബൂബക്കറിന്റെയും വിടവാങ്ങല്‍.അധികം താമസിയാതെ അളിയന്‍ അബൂബക്കര്‍ കോഴിശ്ശേരി അന്ത്യ ശ്വാസം വലിച്ചു.2003 ലെ ജൂണ്‍ മാസത്തിലായിരുന്നു പൊന്നു മോന്‍ അബ്‌സ്വാര്‍ ഓര്‍‌മ്മയായത്.പിന്നീട്‌ സബൂറത്തയും റുഖിയത്തയും വേദനയുള്ള ഓര്‍‌മ്മയായി.2015 ല്‍ അളിയന്‍ മജീദ്‌ ഇടശ്ശേരി അര്‍‌ബുദ രോഗത്തെ തുടര്‍‌ന്ന്‌ അല്ലാഹുവിലേയ്‌ക്ക്‌ യാത്രയായി.2015 ല്‍ തന്നെയായിരുന്നു  സുബൈറയുടെ മാതാവിന്റെ വിയോഗവും.2016 ലെ ഡിസം‌ബറിലായിരുന്നു ഫാസില്‍ ഷം‌സുദ്ധീന്‍ പറന്നു പോയത്.2017 ഒക്‌ടോബര്‍ മാസത്തില്‍ സ്‌നേഹ നിധിയായ ഉമ്മയും നോവൂറുന്ന ഓര്‍‌മ്മയായി.സ്‌നേഹ നിധിയായ ഉമ്മയില്ലാത്ത ലോകത്താണ്‌ ഇനിയുള്ള കാലം ജീവിക്കേണ്ടത് എന്നത്‌ ഭയം ജനിപ്പിക്കുന്നു.അല്ലാഹു അനുഗ്രഹിക്കുമാറാകട്ടെ.

തിരിഞ്ഞു നോക്കുമ്പോള്‍

2000 തുടക്കത്തിലായിരുന്നു ഓണ്‍‌ലൈന്‍ രം‌ഗത്തേക്കുള്ള പ്രവേശം.മധ്യേഷ്യയില്‍ നിന്നും ആദ്യത്തെ ബഹു ഭാഷാ സൈറ്റായ വിന്‍ഡൊ മാഗസിന്‍ അന്നാളുകളില്‍ മാധ്യമങ്ങളില്‍ ഏറെ നിറഞ്ഞു നിന്നിരുന്നു.അഥവാ നീണ്ട 17 വര്‍‌ഷം പിന്നിട്ടിരിക്കുന്നു ഈ സം‌രം‌ഭത്തിനു നാന്ദി കുറിച്ചിട്ടെന്നു സാരം.സാമൂഹികാവബോധം ലക്ഷ്യമാക്കിയുള്ള സൃഷ്‌ടികളുടെ തൂലിക,കവിത,രചന,സാമൂഹികം എന്നീ ബ്ലോഗുകളും ഗൗരവമുള്ള വായനക്കാരാല്‍ ശ്രദ്ധ നേടിയിട്ടുണ്ട്.

വ്യക്തിപരവും എന്നാല്‍ പൊതു സമൂഹവുമായി പങ്കുവെക്കാവുന്ന നാട്ടു വര്‍‌ത്തമാനങ്ങളും സന്തോഷങ്ങളും സന്താപങ്ങളും ഒക്കെയാണ്‌ മഞ്ഞിയില്‍ പ്രഥമ പേജില്‍ പോസ്റ്റു ചെയ്യുന്നത്.തൂലിക,കവിത,രചന,സാമൂഹികം,മണിദീപം എന്നീ ബ്ലോഗുകള്‍ വ്യത്യസ്‌തങ്ങളായ ചിന്തകളും,പാഠങ്ങളും, പഠനങ്ങളും സര്‍‌ഗാത്മാകമായ സൃഷ്‌ടികളുമാണ്‌ പ്രകാശിപ്പിക്കുന്നത്.

ഗ്രാമ വിശേഷങ്ങള്‍‌ക്കായുള്ള ദിതിരുനെല്ലൂരിലെ ആദ്യത്തെ പോസ്റ്റ്‌ 2006 മാര്‍‌ച്ച്‌ മൂന്നിനാണ്‌ ഓണ്‍‌ലൈനില്‍ പ്രകാശിപ്പിക്കപ്പെട്ടത്.ഘട്ടം ഘട്ടമായി പുരോഗമിച്ച ദിതിരുനെല്ലൂര്‍ തിരുനെല്ലൂര്‍ ഗ്രാമത്തിന്റെയും വിശിഷ്യാ ഖത്തര്‍ കൂട്ടായ്‌മയുടെ പ്രവര്‍‌ത്തനങ്ങളെ അം‌ഗങ്ങള്‍‌ക്കിടയില്‍ പ്രചരിപ്പിക്കുന്നതില്‍ ഒരു പരിധിവരെ വിജയം വരിച്ചുവെന്നു കണക്കാക്കപ്പെടുന്നു.നാടും നഗരവും ഓണ്‍ലൈന്‍ ലോകത്തേക്ക്‌ പിച്ചവെച്ചു തുടങ്ങിയ നാളുകളില്‍ തന്നെ ദിതിരുനെല്ലൂര്‍ നടന്നു തുടങ്ങിയെന്നതില്‍ തിരുനെല്ലുര്‍‌ക്കാര്‍‌ക്ക്‌ അഭിമാനിക്കാം.

ഒരു മാതൃകാ ഗ്രാമം എന്ന വിതാനത്തിലേയ്‌ക്ക്‌   ഗ്രാമത്തെ - മഹല്ലിനെ പരിവര്‍‌ത്തിപ്പിക്കണമെന്ന കലശലായ ആഗ്രഹമായിരുന്നു യഥാര്‍‌ഥത്തില്‍ ഇത്തരം സം‌രംഭങ്ങളില്‍ ഉറച്ചു നില്‍‌ക്കാനുള്ള പ്രചോദനം.ഒപ്പം സഹൃദയരായ സഹോദരങ്ങള്‍ നല്‍‌കിക്കൊണ്ടിരിക്കുന്ന  പിന്തുണയും പ്രാര്‍‌ഥനയും.ക്രിയാത്മകമായാലും സര്‍‌ഗാത്മകമായാലും തിരസ്‌കാര സ്വഭാവം സ്വീകരിക്കുന്നവരോടും ഭാവഭേദം കൂടാതെ ഇട കലര്‍‌ന്നും ഇടപഴകിയും ദി തിരുനെല്ലൂര്‍ ഒഴുകിക്കൊണ്ടിരിക്കും.ഒരു സ്വപ്‌ന സാക്ഷാല്‍‌ക്കാരത്തിന്റെ തീരം കൊതിച്ചു കൊണ്ടും പുലരി പ്രതീക്ഷിച്ചു കൊണ്ടും.

കെട്ടിടങ്ങള്‍ കെട്ടിപ്പൊക്കുന്നതിനേക്കാള്‍ പ്രാധാന്യം വ്യക്തികളെ കെട്ടിപ്പടുക്കുന്നതിനു അനിവാര്യമത്രെ.ഒരു നല്ല വ്യക്തി സമൂഹത്തിന്റെ അടിസ്ഥാനമാണ്‌.സാമുഹിക സ്ഥാപനങ്ങള്‍ സമൂഹത്തെ ഏറെ സ്വാധീനിക്കുന്ന ഘടകമാണ്‌.ഇത്തരം സാമൂഹിക സ്ഥാപനങ്ങളില്‍ പള്ളിയായാലും പള്ളിക്കൂടമായാലും അതിന്റെ ചാലകശക്തി യോഗ്യരും സമൂഹത്തോട്‌ ഏറെ പ്രതിബദ്ധതയുള്ളവരും ആയിരിക്കണം.ഒരു പ്രദേശത്തെ അടക്ക അനക്കങ്ങളെ സദാ നിരീക്ഷിച്ചുകൊണ്ടിരിക്കാന്‍ പ്രാപ്‌തരായവര്‍ നേതൃസ്ഥാനങ്ങളില്‍ ഉപവിഷ്‌ഠരാകണം.ചിലപ്പോള്‍ തട്ടിയുണര്‍‌ത്തണം,ചിലപ്പോള്‍ താരാട്ടു പാടണം,ശാസിക്കാനും ഒപ്പം ആശ്വസിപ്പിക്കാനും കഴിയണം.അപകടങ്ങള്‍‌ക്ക്‌ മുന്നറിയിപ്പ്‌ നല്‍‌കണം,അബദ്ധങ്ങളെ ചൂണ്ടിക്കാണിക്കണം,സുബദ്ധങ്ങളെ പരിചരിക്കണം.നീണ്ടു നിവര്‍‌ന്നു പന്തലിച്ചു നില്‍‌ക്കുന്ന ഒരു വലിയ വൃക്ഷച്ചുവട്ടില്‍ സുരക്ഷിതമായ പ്രതീതി പ്രദേശവാസികളില്‍ ജനിപ്പിക്കുന്ന തികച്ചും 'ശാന്തമായ' ഒരു പ്രദേശം.ഇത്തരം പ്രവര്‍‌ത്തനങ്ങളുടെ നേരിയ ഛായ ഓണ്‍ലൈന്‍ വഴിയാണെങ്കിലും ദിതിരുനെല്ലൂരിനുണ്ടാകണം എന്നാണ്‌ അണിയറ ശില്‍‌പിയുടെ മോഹം.ഇതില്‍ നിന്നുള്ള പ്രചോദനം വഴി ഓഫ്‌ലൈനിലും.

മഞ്ഞിയില്‍ ബ്ലോഗിനോടനുബന്ധിച്ച പേജുകള്‍ വാര്‍‌ത്തയായാലും സന്ദേശമായാലും മറ്റു വിശേഷങ്ങളായാലും സഹൃദയര്‍ക്ക്‌ ഏറെ ഹൃദ്യമാകുന്നുവെങ്കില്‍ ഏറെ കൃതാര്‍‌ഥനാണ്‌.കാരണം വിരലുകള്‍ ചലിക്കുന്നുവെങ്കിലും മനസ്സുകൊണ്ടാണ്‌ മുദ്രണം ചെയ്യുന്നത്‌.മനസ്സിന്റെ അഭ്യാസങ്ങള്‍ സുമനസ്സുകള്‍‌ക്ക്‌ തൊട്ടറിയാനാകും.അല്ല സുമനസ്സുകള്‍‌ക്കേ തൊട്ടറിയാനാകൂ.

എല്ലാ സഹൃദയരായ വായനക്കാര്‍‌ക്കും ഹൃദ്യമായ പുതു വത്സരാശം‌സകള്‍.

അസീസ്‌മഞ്ഞിയില്‍.

Thursday, December 21, 2017

ശുഷ്‌കാന്ധത

എന്റെ കണ്ണുകള്‍ക്ക്‌ ഇടയ്‌ക്ക്‌ ബാധിക്കാറുള്ള ശുഷ്‌കാന്ധത ബാധിച്ചു വിശ്രമത്തിലായിരുന്നു. പ്രതിവിധിയായി തര്‍പ്പണം ചികിത്സയ്‌ക്ക്‌ വിധേയനായി ഇപ്പോള്‍ സുഖം പ്രാപിച്ചു വരുന്നു.അഥവാ ഔഷധയോഗ്യമായ നെയ്യ്‌ നിശ്‌ചിത അളവില്‍ നേത്രഗോളത്തിന്മേല്‍ നിര്‍ത്തുന്ന ചികിത്സ.തുടര്‍ച്ചയായി വായിക്കുന്നവരിലും ഇലക്ട്രോണിക് മീഡിയകള്‍ ഉപയോഗിക്കുന്നവരിലും കാണപ്പെടുന്നതാണ്‌ ശുഷ്‌കാന്ധത.

രണ്ടാഴ്‌ച നീണ്ടു നിന്ന തര്‍‌പ്പണം എന്ന കണ്ണ് ചികിത്സയില്‍ സകല കാഴ്‌ച്ചകളും നിഷേധിക്കപ്പെട്ടിരുന്നു.മനോഹരമായ പ്രകൃതിയുടെ മുടിയിഴപോലും കാണാനാകുമായിരുന്നില്ല.നല്ല പാതിയുടെ വിശ്രമമില്ലാത്ത പരിചരണം.ദൈനം ദിന ചര്യകള്‍ എല്ലാം തകിടം മറിഞ്ഞ കാലം.പത്ര വാര്‍‌ത്തകള്‍ ഹിബ മോള്‍ വായിച്ചു തരും.മറ്റു വിശേഷങ്ങളുമായി അമീന മോള്‍ വരും.സാമൂഹിക മാധ്യമങ്ങളിലെ വാര്‍‌ത്താധിഷ്‌ടിത ചര്‍‌ച്ചകളും വരികള്‍‌ക്കിടയിലെ വായനകളും വിലയിരുത്തലുകളുമായി മക്കള്‍ ഉണ്ടാകും.നിശ്ചിത സമയങ്ങളില്‍ വിശുദ്ധ വചനങ്ങളുടെ പാരായണ റെക്കാര്‍‌ഡുകള്‍ ക്രമമനുസരിച്ച് കേള്‍‌പ്പിക്കാനുള്ള ഉത്തരവാദിത്തവും മക്കള്‍‌ക്കായിരുന്നു.അതിനാല്‍ ചികിത്സ കഴിയുന്നതോടെ വിശുദ്ധ വേദം പൂര്‍‌ണ്ണമായും അര്‍‌ഥ സഹിതം ആസ്വദിക്കാന്‍ ഭാഗ്യം സിദ്ധിച്ചു.നിഷ്‌ടയോടെയുള്ള ചികിത്സ നല്ല ഫലം കാണിക്കുന്നുണ്ട്‌.

സോഷ്യല്‍ മീഡിയ കുറച്ചുകാലം ഭാഗികമായും പിന്നെ പര സഹായത്താലും പരിചരിച്ചിരുന്നു.ഇടക്കാലത്ത് വെച്ച് പൂര്‍‌ണ്ണമായും വിരാമമിടാന്‍ നിര്‍‌ബന്ധിതനായി.വീണ്ടും മുഖ പുസ്‌തകത്തില്‍ പ്രത്യക്ഷപ്പെട്ടു കൊണ്ടിരിക്കുന്നു.പരിചരിക്കാനും പകരക്കാരാകാനും സഹായികളുള്ളതിനാല്‍ എന്തിനു പേടിക്കണം.പ്രാര്‍‌ഥിച്ചവര്‍‌ക്കും പ്രതികരിച്ചവര്‍‌ക്കും നന്ദി.ദൈവത്തിനാണ്‌ സര്‍‌വ്വ സ്‌തുതിയും.

Friday, December 1, 2017

തൂവലുകള്‍

വീണ്ടും ഒരു ഡിസം‌ബര്‍. ഉലഞ്ഞുടഞ്ഞ പൂക്കളും പൂങ്കാവനവും.സങ്കടപ്പെരുമഴയുടെ സംഗീതം കാതോര്‍‌ത്ത്‌ മരക്കൊമ്പിലമര്‍ന്നിരിക്കുന്ന പൈങ്കിളികളും.വിങ്ങിപ്പൊട്ടുന്ന സായാഹ്നം.സുധീരനായ കൗമാരക്കാരന്‍ മുഹമ്മദ്‌ ഫാസില്‍ വിടരും മുമ്പേ അടര്‍ന്നു വീണ നിമിഷങ്ങള്‍.

ആത്മവിശ്വാസത്തിന്റെയും അതിലേറെ ശുഭ പ്രതീക്ഷയുടെയും കരുത്തില്‍ വേദനയുടെ വേനലിലും കുരുത്ത്‌ നില്‍‌ക്കുകയായിരുന്നു മുഹമ്മദ്‌ ഫാസില്‍.ആശ്വസിപ്പിക്കുന്നവരുടെ സഹതാപ ധൂമത്തെ നിഷ്‌കളങ്കമായ വിശ്വാസ നൈര്‍‌മല്യം പ്രസരിപ്പിച്ച്‌ തൂത്തെറിയാന്‍ ഫാസിലിനു കഴിയുമായിരുന്നു.ആയുസ്സുണ്ടെങ്കിലും ഇല്ലെങ്കിലും ഒരു പരിഭവവും ഈ കൗമാരക്കാരനുണ്ടായിരുന്നില്ല.അല്ലാഹു തനിക്ക്‌ വിധിച്ചതെന്താണെങ്കിലും സ്വീകരിക്കാന്‍ ഫാസിലിന്റെ മനസ്സും ശരീരവും പാകപ്പെട്ടിരുന്നു.

തന്നെച്ചൊല്ലി മറ്റുള്ളവര്‍ വേദനിക്കുന്നതിലും പ്രയാസപ്പെടുന്നതിലും വല്ലാതെ അസ്വസ്ഥത മുഹമ്മദ്‌ ഫാസിലിന്റെ പ്രകൃതമായിരുന്നു.ഉമ്മയോട്‌ ഭയപ്പെടേണ്ട കാര്യമില്ലെന്നും യാത്രയാകാന്‍ നാഴികകള്‍ മാത്രമാണുള്ളതെന്നും മരണാസഹ്ന ദിന രാത്രങ്ങളില്‍ തന്നെ ഫാസില്‍ ഓര്‍‌മ്മപ്പെടുത്തിയിരുന്നു.ഉമ്മൂമയും ഉമ്മയും ഉണ്ണികളും സഹോദരങ്ങളും ബന്ധുമിത്രാധികളും അവസാനയാത്രയ്‌ക്ക്‌ കണ്‍‌പാര്‍‌ത്ത്‌ തനിക്ക്‌ ചുറ്റും ഉണ്ടാവണമെന്ന ശാഠ്യം പലപ്പോഴും ഹൃദയഭേദകം എന്നതിനുമപ്പുറമുള്ള മാനങ്ങള്‍ കൈവരിച്ചിരുന്നു.

അന്ത്യ നിമിഷങ്ങളില്‍ ഒരു കുതിര സവാരിക്കാരന്റെ കിതപ്പും കുതിപ്പും പ്രകടമായിരുന്നു.ഇത്‌ ബോധം നഷ്‌ടപ്പെട്ടവന്റെ ഗോഷ്‌ഠികളായിരുന്നില്ലെന്നു തിരിച്ചറിയാന്‍ ഫാസിലിന്റെ ഉമ്മൂമയ്‌ക്ക്‌ കഴിഞ്ഞിരുന്നു.ആഘോഷ മൈതാനങ്ങളില്‍ നിഷ്‌കളങ്കരായ പൈതങ്ങള്‍ ഇഷ്‌ടപ്പെട്ട കളിക്കോപ്പുകള്‍ കണ്ട്‌ കൊഞ്ചും വിധം ഉത്സാഹഭാവത്തോടെ...അവന്‍ പറന്നകലുകയായിരുന്നു.ഉമ്മൂമ പകര്‍‌ന്നു കൊടുത്ത ദാഹജലം കൊണ്ട്‌ തൊണ്ട നനച്ച്‌,സര്‍‌വലോക പരിപാലകനായ നാഥന്റെ സ്‌മരണകള്‍ കൊണ്ട്‌ ചുണ്ട്‌ നനച്ച്‌ ഫാസില്‍ ശാന്തനായി വിടപറഞ്ഞു.

പ്രകൃതിരമണീയമായ പാടൂര്‍ പള്ളി പരിസരത്ത്‌ ഒരു തണ്ണീര്‍തടത്തിന്റെ ചാരത്ത്‌ തണലിട്ട മരച്ചുവട്ടില്‍ ഒരുക്കിയ ഖബറിടത്തിലാണ്‌ ഫാസിലിന്റെ ഭൗതിക ശരീരം അടക്കം ചെയ്‌തത്. അനശ്വരമായ സ്വര്‍‌ഗീയ വിതാനത്തില്‍ മുഹമ്മദ്‌ ഫാസില്‍ ഓര്‍‌മ്മയായി.അല്ലാഹു അനുഗ്രഹിക്കുമാറാകട്ടെ. 


ഡിസംബര്‍ കാലത്തെ ശൈത്യം. എന്തുകൊണ്ടോ തണുപ്പനുഭവപ്പെടുന്നില്ല.ഒരു വര്‍‌ഷത്തിന്റെ അന്ത്യം.മറ്റൊരു വര്‍ഷത്തിന്റെ പ്രാരം‌ഭത്തിലേയ്‌ക്കുള്ള പ്രയാണം.പുതിയ ഉണര്‍‌വും ഉന്മേഷവും ശൈത്യകാലത്തെ പുകമഞ്ഞില്‍ മൂടിപ്പുതച്ചുറങ്ങുന്ന കാലം. പാടശേഖരങ്ങളും,പാതയോരങ്ങളും, വസന്തം വിരിയുന്ന കാലം.ആഘോഷങ്ങളുടെ പൂവിരിയും കാലത്തും വിരിയും മുമ്പേ വീണുടയുന്ന പൂക്കള്‍.ആ പുക്കളെ ചൊല്ലി അറിഞ്ഞൊ അറിയാതെയൊ വേപഥു പൂണ്ട്‌ ഉയര്‍‌ന്നും താഴ്‌ന്നും പറക്കുന്ന പൂതുമ്പികള്‍...

പക്ഷികള്‍ പറന്നു പോകുമ്പോള്‍ പൊഴിച്ചിടുന്ന ചില തൂവലുകളുണ്ടാകും.ഒഴിഞ്ഞ കൂട്ടിലും വൃക്ഷ ശിഖിരങ്ങളിലും ചിതറി വീണ ഈ ഹൃദയഹാരിയായ തൂവലുകള്‍.അതില്‍ തൊട്ടു തലോടുമ്പോള്‍ മിഴികളില്‍ ചേര്‍‌ത്തു വെയ്‌ക്കുമ്പോള്‍ നാം മറ്റൊരു ലോക സഞ്ചാരം നടത്തും.ഫാസില്‍ മോന്‍ ഇവിടെ പൊഴിച്ചിട്ട ചില തൂവലുകള്‍ തൊട്ടുഴിയുകയാണ്‌.

2015 ജൂണ്‍ അവസാനത്തില്‍ കുടും‌ബസമേതം നടത്തിയ വിനോദയാത്ര ഒരിക്കല്‍ കൂടെ പങ്കു വെയ്‌ക്കുന്നു.നിമിഷ പ്രസം‌ഗത്തില്‍ മുഹമ്മദ്‌ ഫാസില്‍ ഒന്നാമനായിരുന്നു.2016 ഡിസം‌ബര്‍ മാസത്തില്‍ ഒന്നാമനില്‍ ഒന്നാമനായി എല്ലാവരേയും പിന്നിലാക്കി ഫാസില്‍ പറന്നു പോയി.മുഹമ്മദ്‌ ഫാസില്‍ പറന്നു പോയ നിറം മങ്ങിയ വസന്തകാലം ഇതാ വീണ്ടും സമാഗതമായിരിക്കുന്നു.ഡിസം‌ബര്‍ 2017.
......
പെരുന്നാള്‍ അവധിയില്‍ ഞങ്ങളൊരു വിനോദയാത്ര പോയി.കളിയും കാര്യവും ചിരിയും ചിന്തയുമുണര്‍‌ത്തുന്ന പരിപാടികള്‍ വിനോദയാത്രയെ ഏറെ ഹൃദ്യമാക്കി.

ശനിയാഴ്‌ച പുലര്‍‌ച്ചയ്‌ക്ക്‌ പുറപ്പെട്ടു തിങ്കളാഴ്‌ച്ച പുലര്‍‌ച്ചയ്‌ക്ക്‌ വീട്ടില്‍ തിരിച്ചെത്തി.ഷഫീക്കിന്റെ നേതൃത്വത്തില്‍ തിര ടീമും ഷറഫുദ്ധീന്റെ നേതൃത്വത്തിലുള്ള തീരം ടീമും വിവിധ മത്സരങ്ങളില്‍ തീരവും തിരയും പോലെ മത്സര മികവു പ്രകടിപ്പിച്ചിരുന്നു.ഒടുവില്‍ തിര തീരത്തെ കീഴടക്കുമ്പോലെ അക്ഷരാര്‍‌ഥത്തില്‍ വിജയശ്രിലാളിതരായി.വാശിയേറിയ മത്സരത്തില്‍ മൂന്ന്‌ ഒന്നാം സ്ഥാനങ്ങളാണ്‌ ഷഫീക്കിന്റെ നേതൃത്വത്തിലുള്ള തിര കരസ്ഥമാകിയത്‌.മറ്റൊരു പ്രത്യേക മത്സരത്തില്‍ ഒന്നാം സ്ഥാനത്തെത്തിയതോടെ ഷറഫുദ്ധീന്റെ നേതൃത്വത്തിലുള്ള തീരവും ശാന്തമായി.

കുട്ടിപ്പട്ടാളത്തിന്റെ സര്‍‌ഗസിദ്ധി സടകുടഞ്ഞെണീറ്റപ്പോള്‍ മത്സര രം‌ഗത്തിന്റെ ഹാവഭാവങ്ങള്‍‌ക്ക്‌ പുതിയ ചിറകുകള്‍ മുളച്ചു.മുഹമ്മദ്‌ സഫ്‌വാന്റെ ഖുര്‍‌ആന്‍ പാരായണവും അന്‍‌ഫാല്‍ അഷറഫിന്റെ ഉമ്മയെക്കുറിച്ചുള്ള പാട്ടും ഏറെ ആസ്വാദ്യകരമായിരുന്നു.ആദില്‍ അഷറഫിന്റെ ഗാനാലാപനം തല്‍‌സമയ സമ്മാനം നേടിയതോടെ ഓമനകളുടെ ഉത്സാഹത്തിമര്‍‌പ്പ്‌ പത്തിരട്ടി വര്‍‌ദ്ധിച്ചു.തുടര്‍‌ന്നു അദ്‌നാന്‍ യൂസഫും  മുഹമ്മദ്‌ സല്‍‌മാന്‍ ഷറഫുദ്ധീനും മുഹമ്മദ്‌ സഫ്‌വാന്‍ ഷറഫുദ്ധീനും തത്സമയ സമ്മാനത്തിന്‌ അര്‍‌ഹരായി.പിഞ്ചു കുഞ്ഞുങ്ങളായ മിന്‍‌ഹ ഷാഹീറും മയ്ഷ ഷഫീക്കും പരസ്‌പരം നോക്കി അത്‌ഭുതം കൂറിയിരുന്നു എന്നു പറഞ്ഞാല്‍ മത്സരക്കളത്തിന്റെ വീറും വാശിയും ഒരു പക്ഷെ ഊഹിക്കാന്‍ കഴിയുമായിരിക്കും.അമീന അസീസ്‌ ഒരു കഥ അവതരിപ്പിക്കാന്‍ ശ്രമിച്ചു പിന്‍‌വാങ്ങി.എന്നാല്‍ അനുഭവങ്ങള്‍ പങ്കുവെച്ചപ്പോള്‍ വാചാലയായി.

ഉമ്മ തന്നയച്ച ഉച്ചഭക്ഷണം ഇഷ്‌ടപ്പെടാത്ത അവസ്ഥയില്‍ തിരിച്ച്‌ വീട്ടിലെത്തി പ്രതികരിക്കുന്ന വിഷയത്തെ ആസ്‌പദപ്പെടുത്തിയ നിമിഷ പ്രസം‌ഗം പങ്കാളിത്തം കുറഞ്ഞുപോയെങ്കിലും പങ്കെടുത്തവര്‍ വിളമ്പിയതിന്റെ പേരിലുള്ള ബഹളം ശാന്തമാക്കാന്‍ കഠിനയജ്ഞം നടത്തേണ്ടിവന്നു.ഒന്നാം സ്ഥാനം ഫാസില്‍ ഷംസുദ്ധീനും,രണ്ടാം സ്ഥാനം അന്‍‌സാര്‍ അസീസും, പ്രോത്സാഹന സമ്മാനം അമീന അസീസും, മുഹമ്മദ്‌ സല്‍‌മാനും, അജ്‌മല്‍ ഷം‌സുദ്ധീനും  നേടി.തിര ടീമിനെ ഊര്‍‌ജസ്വലമാക്കുന്നതില്‍ വലിയ പങ്കുവഹിച്ച ഷഫ്‌ന അഷറഫ്‌ പ്രത്യേക പാരിതോഷികം കരസ്ഥമാക്കി. മൂന്നു വയസ്സുകാരായ അംന അഷറഫും, അമീന്‍ യൂസഫും ഒന്നര വയസ്സുകാരിയായ ഐഷ ഷറഫുദ്ധീനും,  അഞ്ചു വയസ്സുകാരനായ ആദില്‍ അഷറഫും പ്രത്യേക പരിഗണനക്കും പ്രശം‌സക്കും അര്‍‌ഹരായി.

വിനോദയാത്രയുമായി ബന്ധപ്പെട്ട അനുഭവങ്ങള്‍ പങ്കുവെക്കാന്‍ നല്‍‌കപ്പെട്ട അവസരം അന്‍‌സാര്‍ അസീസും ഷജീല ഷറഫുദ്ധീനും അതിമനോഹരമായി ഉപയോഗപ്പെടുത്തി.അമീനമോള്‍ ഏറെ വാചലയായതും ശ്രദ്ധേയമായിരുന്നു.ഇവര്‍ പറഞ്ഞതു തന്നെയാണ്‌ ഞങ്ങള്‍ക്കും എന്നു പറഞ്ഞു മറ്റുള്ളവര്‍ വളരെ സമര്‍ഥമായി ഒഴിഞ്ഞു നിന്നു.

ബഹളമയമെങ്കിലും ആസ്വാദ്യകരമായ കലാവിരുന്നിന്‌ ക്ഷമാപൂര്‍‌വം കാഴ്‌ചക്കാരായ ഷം‌സുദ്ധീന്‍,യൂസഫ്‌,അഷറഫ്‌,ഷറഫുദ്ധീന്‍,ഷഫീഖ്‌, ഹലീമ ബക്കര്‍, സീനത്ത്‌ ഷം‌സുദ്ധീന്‍, ഷംല യൂസഫ്‌,സുല്‍‌ഫിത്ത്‌ അഷറഫ്‌,റഹ്‌മത്ത് ഷഫീഖ്‌,മുനീറ ഷാഹിര്‍,ഹിബ അസീസ്‌,ഫാത്തിമ മുസ്‌തഫ,നസ്‌റിന്‍ യൂസഫ്‌,ഷറിന്‍ യൂസഫ്‌,കുത്സു ഷംസുദ്ധീന്‍,ഷജീല ഷറഫുദ്ധീന്‍,ഹമദ്‌ അസീസ്‌,അബിയാന്‍ അഷറഫ് എന്നിവരെ പ്രത്യേകം സത്‌കരിക്കും.പ്രസ്‌തുത ചടങ്ങില്‍ മറ്റു സമ്മാനാര്‍‌ഹരും കുടും‌ബാം‌ഗങ്ങളും ക്ഷണിക്കപ്പെടും.
മഞ്ഞിയില്‍
27.07.2015

Sunday, November 12, 2017

തലമുറക്കണ്ണികള്‍

ഉമ്മയും ഉപ്പയും ഞങ്ങള്‍ കുടും‌ബാം‌ഗങ്ങള്‍ 12 പേര്‍.രണ്ടാം തലമുറയില്‍ 34 മക്കള്‍.മൂന്നാം തലമുറയില്‍ 57 പേര്‍.നാലാം തലമുറയില്‍ 11 പേര്‍.ഇങ്ങനെ 114 മക്കളും പേരമക്കളും.വിവാഹ ബന്ധങ്ങള്‍ വഴിയുള്ള ഇണ തുണകള്‍ 46 പേര്‍.എല്ലാവരും കൂടെ 160 പേര്‍. ഇതില്‍ സഹോദരി ആമിനക്കുട്ടിയുടെ മകള്‍ സീനത്തിന്റെ രണ്ടാമത്തെ പുത്രന്‍ അഫ്‌സലിന്റെ രണ്ടാമത്തെ മകനാണ്‌ നാലാം തലമുറയിലെ പതിനൊന്നാമന്‍.ഉമ്മയുടെ വിയോഗാനന്തരം ഈ കുടുംബത്തില്‍ വന്ന പുതിയ അതിഥിയാണ്‌ അഫ്‌സല്‍ ഷം‌സുദ്ധീന്റെ പുത്രന്‍.സ്‌നേഹ നിധിയായ ഉമ്മയുടെ വിയോഗത്തിന്റെ തൊട്ടു മുമ്പ്‌ സഹോദരി ഫാത്തിമ്മ അബൂബക്കറിന്റെ രണ്ടാമത്തെ മകള്‍ ഹസീന ലത്വീഫിന്റെ മൂന്നാമത്തെ പുത്രനാണ്‌ മൂന്നാം തലമുറയില്‍ അമ്പത്തിയേഴാമത്തെ അം‌ഗം.